Oafgelopen deunderdag was het zo wied. De Tweta-bakfiets wön’n officieel in gebroek nöm’n in Tubbig. Tweta steet vuur “Twentse taal en cultuur ambassadeur”.

Adrie Hemmink, met twee ambassadeurs, te wett’n Frank Droste en Marian Lentferink gung’n op de koffie bie Anko Postma, de burgemeester van Tubbig, Netuurlijk mog doar de Twentse kreent’nweg nig ontbrekk’n, dus den had’n ze zölf mear metbracht. Met de sprök: “Wat sas, as dös, was kaans”op de krent’nweg, had’n ze ok drekt wat um te kuier.

Met de bakfiets wilt de Tweta’s op daag’n dat d’r wat te doon is in de dorp’n, aandacht vroag’n vuur het belang van het behoold van het Twents in taal, cultuur en gebroek’n.

De fiets is vuur vereniging’n en groep’n ok te leen. In ’n bak zit spul’n die informatie geft oaver oos’n strek. De fiets wördt stalt in de bieb van Tubbig en wördt gebroekt vuur alle dorp’n. Verscheen leu hebt de bakfiets met de Tukkerstocht al in Alberg zeen stoan.

De burgemeester was d’r na oaver te sprekk’n, hij onnersteunt het initiatief en dach zölf ok merakels mooi met. Um zo te zegg’n: het was ’n vruchtbaar gesprek en het krig later in de tied ok nog’n vervolg. Hiermet is wier één van de 15 bakfietsen op de stie kömm’n. De bedoeling is um in iedere Twentse gemeente ne bakfiets te stall’n. Want aj plat könt proat’n, dan muj’t nig loat’n!